| ཞང་ཞུང་གི་བྱ་རུ་ཅན་གྱི་རྒྱལ་པོ་བཅོ་བརྒྱད། ཚོན་རིས་དང་སྐྱ་རིས། 2016-9-1 18:42:30 རྩོམ་པ་པོ། བླ་མ་ཚུལ་ཁྲིམས་ཕུན་ཚོགས། བྱུང་ཁུངས། གངས་ལྗོངས་བོན། ཀློག་གྲངས། ཞང་ཞུང་ཕུགས་པ་ཁྱུང་ལུང་དངུལ་མཁར་གུར་གྱམ་དགོན་ཐུགས་བསྟན་གཟི་འབར་མདོ་སྔགས་གྲགས་རྒྱས་གླིང་གི་དུས་གསུམ་འགྱུར་མེད་གཙུག་ལག་ཁང་གི་གཡོན་གཤམ་གྱི་ལྡེབས་རིས། ༡ ༽ ཞང་ཞུང་བྱ་རུ་ཅན་གྱི་རྒྱལ་པོ་བཅོ་བརྒྱད་ཀྱི་ཚོན་རིས།
ཀ་རུ་གྲུབ་དབང་བསྟན་འཛིན་རིན་ཆེན་རྒྱལ་མཚན་གྱིས་མཛད་པའི་འཛམ་གླིང་གངས་རྒྱལ་ཏི་སེའི་དཀར་ཆག་ཚངས་དབྱངས་ཡིད་འཕྲོག་ལས།འཛམ་གླིང་ཤེས་རིག་གི་འབྱུང་ཁུངས་ཞང་ཞུང་སྒོ་ཕུག་བར་གསུམ། དེ་ཡང་ཡུལ་ཆེན་བཅོ་བརྒྱད་ཀྱི་སྙིང་པོ་ཞང་ཞུང་བོན་གྱིས་ཡུལ་ཞེས་བྱ་བའི་ལོ་རྒྱུས་ཅུང་ཟད་བཤད་པ་ལ། ཞང་ཞུང་སྒོ་ཕུག་བར་གསུམ་ལའང་གསུམ་གསུམ་མོ། །དེ་གང་ཞེ་ནའང་། ཞང་ཞུང་གཡས་སྒོ་དང་གཡོན་སྒོ་དབུས་སྒོ་གསུམ་དུ་ཡོད་པ་ལ། དེ་ཡང་གཡས་ནི་ཕུག་སྟག་རི་ཁྲ་བོ་སྨན་གྱི་རི་དང་། བར་ལ་མོ་གངས་ར་ཕྱི་ཡི་རི་དང་། སྒོ་མཁའ་འགྲོ་འདུས་གླིང་ཙ་ཡི་རི་དང་གསུམ་མོ། །དེ་ལྟར་དུའང་གཡོན་སྒོ་ཕུག་ཏི་སེ་དང་མ་པང་གཡུ་མཚོ། བར་རྟ་རྒོ་དང་དང་ར་གཡུ་མཚོ། སྒོ་ཐང་ལྷ་དང་གནམ་མཚོ་ཕྱུག་མོ་དང་གསུམ་མོ། །དེ་ལྟར་དུའང་དབུས་སྒོ་ནི། ཕུག་ཁྱུང་ཆེན་སྤུངས་རི་དང་ཁྱུང་ལུང་དངུལ་མཁར། བར་ལྷ་རི་གྱང་ཏོ་དང་རྒྱལ་མཁར་འཕན་གླིང་། སྒོ་ཤེ་ལེ་རྒྱ་སྐར་དང་ཁྱུང་པོ་གཏིང་རྫོང་སོགས་གསུམ་མོ། །དེ་ལ་སྤྱི་ལྟར་ན་སྟོད་མངའ་རིས་སྐོར་གསུམ་ཞང་ཞུང་གི་ཡུལ་དང་། བར་དབུས་གཙང་རུ་བཞི་བོད་ཡུལ་དང་། སྨད་མདོ་གང་སྒང་དྲུག་རྒྱ་ནག་གི་ཡུལ་སོགས། ཞང་ཞུང་སྒོ་ཕུག་བར་གསུམ་དང་། ཁྱད་པར་ཞང་ཞུང་ཁྲི་སྡེ་བཅོ་བརྒྱད་གཙོས་པའི་ཡུལ་ཆེན་བཅོ་བརྒྱད་ལ་མངའ་དབང་ཆེ་བའི་རྒྱལ་པོ། སྲིད་པ་གནམ་ནས་སྐོས་པའི་ཞང་ཞུང་སྲིད་པའི་རྒྱལ་པོ།
ཁྲི་ཝེར་ལ་རྗེ་གུ་ལང་གསེར་གྱི་བྱ་རུ་ཅན་དང་། ཞུང་ཞང་ཟིལ་གནོན་རྒྱལ་པོ་རླབས་ཆེན་ཁྱུང་གི་བྱ་རུ་ཅན་དང་། ཧྲི་དོ་གྱེར་སྤུངས་རྒྱལ་པོ་ཀང་ཀ་ཤེལ་གྱིས་བྱ་རུ་ཅན་དང་གསུམ་ནི། གངས་རི་ཆེན་པོའི་མདུན་རྒྱང་རི་གཡུ་ལོ་ལྗོན་པའི་རྫོང་མཁར་དུ་ཆགས་སོ། །
དེ་ལྟར་དུའང་ཁྱུང་ལུང་རྒྱལ་བ་མཉེས་ཡུལ་དུ། སླས་ཀྲ་གུ་གེའི་རྒྱལ་པོ་རིན་ཆེན་འོད་ཀྱི་བྱ་རུ་ཅན་དང་། རྒྱུང་ཡར་མུ་ཁོད་རྒྱལ་པོ་གཞའ་ཚོན་འོད་ཀྱི་བྱ་རུ་ཅན་དང་། ཀྱི་ལེ་གུ་གེ་རྒྱལ་པོ་ཨུན་ཆེན་དུང་གི་བྱ་རུ་ཅན་དང་གསུམ་མོ། །
ཞང་ཞུང་པུ་མར་ཧྲང་གི་ཡུལ་དུ། སྤུངས་རྒྱུང་གྱེར་གྱི་རྒྱལ་པོ་བྱེ་རུ་འོད་ཀྱི་བྱ་རུ་ཅན་དང་། ཉེ་ལོ་ཝེར་ཡ་རྒྱལ་པོ་ཕྲ་མེན་འོད་ཀྱི་བྱ་རུ་ཅན་དང་གཉིས་སོ། །
ཞང་ཞུང་ཙི་ནའི་ཡུལ་དུ་སྟག་སྣ་གཟི་བརྗིད་རྒྱལ་པོ་ཟོམ་ཤང་ལྕགས་ཀྱི་བྱ་རུ་ཅན་དང་། ཛོ་དམར་ཐིས་སྤུངས་རྒྱལ་པོ་མེ་དཔུང་འོད་ཀྱི་བྱ་རུ་ཅན་དང་གཉིས་སོ། །
ཞང་ཞུང་ཏ་རོག་ཡུལ་དུ་བདུད་འདུལ་དབལ་གྱི་རྒྱལ་པོ་ཉི་ཤེལ་འོད་ཀྱི་བྱ་རུ་ཅན་དང་། ལི་ཝེར་གྱེར་གྱི་རྒྱལ་པོ་ཟླ་ཤེལ་འོད་ཀྱི་བྱ་རུ་ཅན་དང་གཉིས་སོ། །
ཞང་ཞུང་རྟ་སྒོའི་ཡུལ་དུ་ཤེལ་རྒྱུང་ཧྲི་དོ་རྒྱལ་པོ་ཛོ་དམར་འོད་ཀྱི་བྱ་རུ་ཅན་དང་། ལིག་མུར་ནམ་མཁའི་རྒྱལ་པོ་བེ་དྷུརྱ་འོད་ཀྱི་བྱ་རུ་ཅན་དང་གཉིས་སོ། །
ཞང་ཞུང་རུ་ཐོག་ཡུལ་དུ་མུ་མར་ཐོག་རྒོད་རྒྱལ་པོ་ཨེན་ཌ་འོད་ཀྱི་བྱ་རུ་ཅན་སོགས། ཞང་ཞུང་གི་རྒྱལ་པོ་བྱ་རུ་ཅན་བཅོ་བརྒྱད་འདི་རྣམས་ཀྱི་རིང་ལ། ཞང་ཞུང་ཁྲི་སྡེ་བཅོ་བརྒྱད་ལ་སོགས་ཡུལ་ཆེན་བཅོ་བརྒྱད་ཀྱི་མགོ་ནོན་པ་དང་། གཡུང་དྲུང་བོན་གྱི་བསྟན་པ་ཕྱོགས་བཅུར་རྒྱས་ཤིང་། སྐུ་ཚེ་ཡང་མི་ལོ་གཉིས་སྟོང་དུ་བཞུགས་པ་དང་། ཕུང་པོ་ལྷག་མེད་དུ་སངས་རྒྱས་པའང་ཡོད་པའོ། །ཞེས་དང་། ཆགས་པའི་ཡུལ་མ་འགྱུར་བ་ཞང་ཞུང་སྒོ་ཕུག་བར་གསུམ་དུ་ཆགས། བརྟེན་པའི་རི་མ་འགྱུར་བ་འཛམ་གླིང་གངས་ཏི་སེ་རུ་སྲིད། གནས་པའི་མཚོ་མ་འགྱུར་བ་མ་པང་གཡུ་མཚོ་སྔོན་མོ་རུ་སྲིད། རྒྱལ་བའི་བསྟན་པ་མ་འགྱུར་བ་གཡུང་དྲུང་གི་བོན་རིན་པོ་ཆེ་ཕྱོགས་བཅུ་ཀུན་ཏུ་དར་ཞིང་རྒྱས། སྒྲུབ་པའི་གཤེན་མ་འགྱུར་བ་བོན་རིག་འཛིན་བརྒྱད་ཅུ་རུ་ཕེབས། འོག་གི་རྒྱལ་པོ་མ་འགྱུར་བ་ཞང་བོད་གནམ་བབ་ཀྱི་རྒྱལ་པོ་སུམ་ཅུ་སོ་གཅིག་གིས་མཛད་ཅིང་ཤིན་ཏུ་དར་ལ་རྒྱས་སོ། ། ཞེས་གསུངས་སོ།། ལྡོང་མདོ་ཚང་དབུ་མཛད་ཆེན་མོ་ཕུན་ཚོགས་འབྱོར་རྒྱས་གཙོས་དགེ་སློབ་རྣམ་པ་ཚོས་ཞང་ཞུང་ལྡོང་ལུགས་ཀྱི་རྒྱུན་སྲོལ་རི་མོ་ལྟར་བྲིས། ༢ ༽ ཞང་ཞུང་བྱ་རུ་ཅན་གྱི་རྒྱལ་པོ་བཅོ་བརྒྱད། སྐྱ་རིས། ཞང་ཞུང་། འདི་ནི་སྔར་བོན་ཆོས་དར་རྒྱས་ཆེ་བའི་ཡུལ་ཞིག་ཡིན་པར་བོན་དང་བོད་ཀྱི་ལོ་རྒྱུས་མང་ཆེ་བ་མཐུན་ཞིང་ས་གནས་གང་དུ་ཡོད་མེད་དང་། ས་རྒྱ་ཆེ་ཆུང་གི་སྐོར་ལ་བཤད་ཚུལ་མི་མཐུན་པ་སྣ་ཚོགས་འདུག བོན་གྱི་ལོ་རྒྱུས་ལས། ཞང་ཞུང་གི་རྒྱལ་པོ་ཁྲི་ཝེར་ལ་གུ་ལང་གསེར་གྱི་བྱུ་རུ་ཅན་ལ་སོགས་པ་གྲགས་ཆེ་བ་བཅོ་བརྒྱད་བྱུང་བ་དེ་དག་གིས་ཞང་ཞུང་སྒོ་ཕུག་བར་གསུམ་སྟེ་མདོ་སྨད་ཀྱི་ཕྱོགས་ལ་སྒོ་དང་། དབུས་གཙང་གི་ཕྱོགས་ལ་བར། མངའ་རིས་ལ་དྭགས་ཀྱི་ཕྱོགས་ལ་ཕུག་ཅེས་བརྗོད་པར་བཤད། ༼ཆོས་འབྱུང་མཁས་པའི་དགའ་སྟོན། ༽ལས་ཞང་ཞུང་གི་སྟོང་སྡེ་འདྲེན་པའི་སྐབས་བོད་དང་གྲུ་གུ་གཉིས་ཀྱི་མཚམས་ན་འོ་ཅོ་མང་མ་གཉིས་སོགས་ཞང་ཞུང་སྟོད་ཀྱི་སྟོང་སྡེ་ལྔ། བོད་དང་སུམ་པའི་མཚམས་ན་གུ་གེ། ཅོག་ལ་གཉིས་སོགས་ཞང་ཞུང་སྨད་ཀྱི་སྟོང་སྡེ་ལྔ་བཅས་ཞང་ཞུང་གི་སྟོང་སྡེ་བཅུ་ཡོད་པར་བཤད། ཞང་ཞུང་བོད་ཀྱི་བཙན་པོའི་རྒྱལ་རབས་ཀྱི་མངའ་ཁོངས་སུ་ཚུད་པའི་དུས་ནི་རྒྱལ་པོ་སྲོང་བཙན་སྒམ་པོའི་གོང་ཡབ་གནམ་རི་སྲོང་བཙན་གྱི་དུས་སུ་ངོ་ལོག་བྱས་པ་དང་། དེ་རྗེས་རྒྱལ་པོ་སྲོང་བཙན་སྒམ་པོས་རང་ཉིད་ཀྱི་སྲིང་མོ་སྲད་མ་ཀ་ལ་ལིག་བྱ་བ་དེ་ཞང་ཞུང་གི་རྒྱལ་པོ་ལིག་མི་རྐྱ་ལ་བག་མར་བཏང་རྗེས། ཞང་ཞུང་སླར་ཡང་མངའ་འོག་ཏུ་བཅུག་ཐོག སྤུག་གྱིམ་བཙན་སྨང་ཆུང་ཞང་ཞུང་གི་སྤྱི་དཔོན་དུ་བསྐོས་པར་བཤད། ༼ཆོས་འབྱུང་མཁས་པའི་དགའ་སྟོན།༽ནང་ད་དུང་རྒྱལ་པོ་སྟག་རི་གཉན་གཟིགས་ཀྱི་དུས་སུ་བན་པ་རྗེ། འ་ཞ་རྗེ། དྲང་གར་རྗེ། ཟིང་པོ་རྗེ། ཞང་ཞུང་རྗེ་རྣམས་བཏུལ་བ་དང་། ཉང་སྦས་གནོན་གསུམ་འབངས་སུ་ཚུད་པ་སོགས་གསུངས་པ་རྣམས་ཕན་ཚུན་གུང་བསྒྲིགས་སྐབས། རྩོམ་པ་པོས་གསུངས་པའི་ལོ་རྒྱུས་ཀྱི་ནང་དོན་མང་པོ་ཞིག་ཏུན་ཧོང་གི་བོད་ཡིག་ལོ་རྒྱུས་ཐོག་ནས་ར་སྤྲོད་བྱེད་ཐུབ་པ་བྱུང་བ་དེར་བརྟགས་ན། ༼ཆོས་འབྱུང་མཁན་པའི་དགའ་སྟོན།༽ མཛད་སྐབས་ཏུན་ཧོང་གི་ལོ་རྒྱུས་ཡིག་རྙིང་དང་འདྲ་བའི་དཔྱད་གཞིའི་ཡིག་ཆ་ཁུངས་ཐུབ་མང་པོ་ཞིག་སྐབས་དེར་ཕྱག་ལ་སོན་ཡོད་པ་གསལ་པོར་མཐོང་ཐུབ་ཀྱི་འདུག །
ལྡོང་མདོ་ཚང་དབུ་མཛད་ཆེན་མོ་ཕུན་ཚོགས་འབྱོར་རྒྱས་ཀྱིས་བྲིས། ཞང་ཞུང་ཁྱུང་ལུང་དངུལ་མཁར་བ་ཚུལ་ཁྲིམས་ཕུན་ཚོགས་ཀྱིས་ཞང་ཞུང་རྒྱལ་པོ་འབྲི་མཁན་ཚོ་ལ་ཕན་ཐོག་ཡོང་བར་སྙམ་སྟེ་༢༠༡༦/༩/༡ཉིན་སྤེལ་བའོ། །
|
