ཉེ་ཆར་ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་དུ་ཀྲུང་དབྱང་འཐབ་ཕྱོགས་གཅིག་གྱུར་པུད་དང་ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་གཉིས་ཀྱིས་བཀོད་སྒྲིག་ལྟར་ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་གི་དགེ་རྒན་ཆེན་མོ་ཀླུ་ཕུག་དགོན་པའི་དཔོན་སློབ་༧སྨན་རིའི་དགེ་བཤེས་གཡུང་དྲུང་གཙུག་ཕུད་མཆོག་དང་རྔ་བ་སྣང་ཞིག་དགོན་པའི་སློབ་ཟུར་དགེ་བཤེས་ལུང་རྟོགས། དགའ་མལ་དགོན་ཆེན་གྱི་དཔོན་སློབ་སྨན་རིའི་དགེ་བཤེས་ཤེས་རབ་མཐར་ཕྱིན་ནམ་བཀྲ་གཡུང་གསུམ་པོས་དཔང་བཞུགས་དགེ་རྒན་མཛད་ཅིང་དགེ་བཤེས་རྣམ་པ་དྲུག་གིས་སྤྱི་ཟླ་ལྔ་པའི་ཚེས་བཅུ་གསུམ་ནས་འགོ་རྩོམ་སྟེ་སྣང་ཞིག་དགོན་དང་ཀླུ་ཕུག་དགོན་ནས་གདན་ཞུས་རིག་ལུང་བ་བརྒྱད་ཀྱིས་རྩོད་པ་གནང་ཞིང་དབུ་ཕར་གཉིས་ལ་དམ་བཅའ་བཞག་པ་དང་། དེ་བཞིན་སྤྱི་ཚེས་བཅུ་བཞི་དང་བཅུ་ལྔ་ཉིན་ལ་དགེ་བཤེས་ནང་ཚན་འདུལ་མཛོད་གཞུང་རེར་རྩོད་པ་གཉིས་རེ་དང་དམ་བཅའ་གཉིས་རེ་བཞག་སྟེ་སོ་སོའི་རིག་རྩལ་གང་ཡོད་རྩལ་བཏོན་བྱས་ནས་རྒྱུག་སྤྲོད་ལེགས་པོར་སྤྲད་མཐར། སྤྱི་ཚེས་བཅུ་དགུ་ཉིན་ཀྲུང་དབྱང་འཐབ་ཕྱོགས་གཅིག་གྱུར་པུད་ཀྱི་པུད་ཀྲང་སྐུ་བཞོན་སྲི་ཐར་མཆོག་དང་གླིང་གཙོ་འཇམ་དབྱངས་བཞད་པ་རིན་པོ་ཆེ་དབུས་པའི་བོད་ཀྱི་ནང་བསྟན་མཐོ་རིམ་སྐྱེས་ཆེན་དུ་མ་དབུས་བཞུགས་ཐོག་ནང་བསྟན་དགེ་ཆེན་རིམ་པ་དང་པོ་དང་རིམ་པ་གཉིས་པའི་ཐོབ་ཐང་ལག་ཁྱེར་གནང་བ་དང་དུས་བབ་ལྟར་བསྟན་པ་འཛིན་སྐྱོང་སྤེལ་བའི་མཛད་འཕྲིན་ལམ་ལྷོང་ཡོང་བའི་ཆ་རྐྱེན་མེད་དུ་རུང་བ་ཞིག་ཡིན་པར་སྙམ།
དེ་ཡང་དགེ་བཤེས་རྣམ་པ་དྲུག་ནི་ཆབ་མདོ་རྫོང་མང་རི་དགོན་སྨན་རིའི་དགེ་བཤེས་གཡུང་དྲུང་སྨོན་ལམ།
ཟི་ཁྲོན་ཉག་རོང་རྫོང་ཡེ་ཤེས་དགོན་དགེ་བཤེས་ཨ་ཀུན་གསལ་ཟླ་བ།
བོད་ལྗོངས་སྟེང་ཆེན་རྫོང་རྩེ་དྲུག་དགོན་བོད་ལྗོངས་ནང་བསྟན་སློབ་གླིང་དགེ་རྒན་ཆེན་མོ་དགེ་བཤེས་སྐལ་བཟང་ཚུལ་ཁྲིམས།
བོད་ལྗོངས་སྦྲ་ཆེན་རྫོང་ལུང་དཀར་དགོན་བཤད་སྒྲུབ་སློབ་གླིང་དགེ་རྒན་དགེ་བཤེས་ཤེས་རབ་མཐར་ཐུག།
བོད་ལྗོངས་འབྲི་རུ་རྫོང་དངུལ་ཁོ་དགོན་དགེ་བཤེས་ཚུལ་ཁྲིམས་སྨོན་ལམ།
ཟི་ཁྲོན་རྔ་བ་རྫོང་སྣང་ཞིག་དགོན་སློབ་ཟུར་དགེ་བཤེས་བསྟན་འཛིན་སྨོན་ལམ་བཅས།
