| ༧རྒྱལ་བ་སྨན་རི་བའི་བརྟན་བཞུགས་རྒྱས་འབུལ་ཉིན་གསུམ་རིང་གི་མཛད་རིམ་གནད་བསྡུས།
2016-11-3 23:48:37 རྩོམ་པ་པོ། ཁྲི་གཡུང་དྲུང་། བྱུང་ཁུངས། གཡུང་དྲུང་བོན་དྲ་བ་ལས་བཏུས། ཀློག་གྲངས། ༧སྐྱབས་རྗེ་༧རྒྱལ་བ་སྨན་རི་བའི་བརྟན་བཞུགས་ཉིན་དང་པོ། འཛམ་གླིང་བོན་གྱི་གཙུག་རྒྱན་དཔོན་གསས་བླ་མ་༧སྐྱབས་རྗེ་༧རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཆོག་ལ་བཀའ་དྲིན་རྗེས་དྲན་མཎྚལ་བརྟན་བཞུགས་བསྟར་འབུལ་གྱི་མཛད་རིམ་དབུ་འཛུགས་གནང་བ། གསལ་བསྒྲགས་སྔོན་སོང་ལྟར་གཤེན་གྱི་འབྱུང་ལྡན་༣༠༡བོད་མེ་སྤྲེལ་ལོའི་ཟླ་བ་དགུ་པའི་ཚེས་གཅིག་ནས་གསུམ་བར་ཏེ། ཕྱི་ལོ་༢༠༡༦ཟླ་༡༠ཚེས་༣༡ནས་ཟླ་བ་༡༡ཚེས་༠༢བར་ཏེ་ཉིན་གསུམ་གྱི་རིང་ལ་གཡུང་དྲུང་བོན་གྱི་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་རྒྱལ་སྤྱིའི་གཡུང་དྲུང་བོན་གྱི་བརྟན་བཞུགས་གོ་སྒྲིག་ཚོགས་པ་ནས་གོ་སྒྲིག་ལྟར་༧སྐྱབས་རྗེ་༧རྒྱལ་བ་སྨན་རི་བའི་ཁྲི་འཛིན་སོ་གསུམ་པ་རིན་པོ་ཆེ་ལ་མཎྚལ་བརྟན་བཞུགས་རྒྱས་འབུལ་ཞུ་བཞིན་ཡོད་པ་ལྟར། ཐོག་མར་ཕྱི་ལོ་༢༠༡༦ཟླ་༡༠ཚེས་༣༡ཉིན་ས་གནས་བརྟན་བཞུགས་གོ་སྒྲིག་ཚོགས་ཆུང་དང་དབུས་གཡུང་དྲུང་བོན་འཛིན་སྐྱོང་ལྷན་ཚོགས། ༧དཔལ་གཤེན་བསྟན་སྨན་རིའི་གླིང་། གཡུང་དྲུང་བོན་གྱི་བཤད་སྒྲུབ་འདུས་སྡེ་བཅས་ནས་མཛད་སྒོ་གོ་སྒྲིག་ཞུས་པ་བཞིན་ཐོག་མར་ཞོགས་པའི་ཆུ་ཚོད་༩པའི་སྟེང་༧སྐྱབས་རྗེ་༧རྒྱལ་བ་སྨན་རི་བ་མཆོག་གི་བཀའ་དགོངས་བཞིན་༧སྨན་རིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ་མཆོག་གིས་བོད་ཕྱི་ནང་གཉིས་དང་ནུབ་ཕྱོགས་ཡུལ་གྲུ་ཁག་ནས་ཆེད་ཕེབས་གནང་བའི་བླ་སྤྲུལ་སེར་སྐྱ་དད་ལྡན་ཡོངས་ལ་སྙིང་པོ་རྣམ་གསུམ་གྱི་ལྗགས་ལུང་དང་བཀའ་འཁྲིད་བསྩལ་ཡོད་པ་དང་།
ཕྱི་དྲོའི་ཆུ་ཚོད་གཉིས་པ་ཙམ་ནས་བླ་སྤྲུལ་དགེ་བཤེས་རྣམས་དང་དགེ་འདུན་པ་དང་བཙུན་མ་ཡོངས་ཀྱིས་༧དཔལ་གཤེན་བསྟན་སྨན་རིའི་ཚོགས་ཁང་ཆེན་མོ་ལ་རྒྱལ་བའི་གསུང་རབ་མདོ་འབུམ་ལྗགས་ཀློག་གནང་ཡོད་པ་དང་། དད་ལྡན་མང་ཚོགས་རྣམས་ཀྱིས་ལམ་འཕྲང་བཅོས་པ་དང་། ཚ་ཚ་གདབ་པ་སོགས་རྒྱུན་བཞིའི་གེགས་སེལ་རིགས་ལ་འབད་འབུངས་གནང་ཡོད་པ་རེད།
བརྟན་བཞུགས་མཛད་སྒོ་ལ་ཆེད་དུ་ཕེབས་པའི་སྐུ་མགྲོན་ཁག་ནི། ༧དཔལ་ཁྲི་བརྟན་ནོར་རྩེའི་༧མཁན་རིན་པོ་ཆེ་ལུང་རྟོགས་བསྟན་པ་གཡུང་དྲུང་རིན་པོ་ཆེ་མཆོག་དང་། ༧དཔལ་ཁྲི་བརྟན་ནོར་རྩེ་བཤད་སྒྲུབ་མཁན་སློབ་རྣམ་པ་གཉིས་གཙོས་བཤད་སྒྲུབ་གྲྭ་ཚང་གི་དགེ་སློབ་གྲངས་བརྒྱ་ལྷག་དང་། རྡུ་ར་ཊུན་རྫ་སྨོན་རྒྱལ་དགོན་པའི་དགེ་བཤེས་གཡུང་དྲུང་བསྟན་འཛིན་ལགས་གཙོས་དགེ་སློབ་རྣམ་པ། ཞུ་རི་ཞང་གཡུང་དྲུང་ཀུན་གྲགས་གླིང་གི་དགེ་སློབ་རྣམ་པ། ལ་དྭགས་བོན་དགོན་གྱི་དབུ་འཛིན་དགེ་བཤེས་ལུང་རིག་ཉི་མ་ལགས། བལ་ཡུལ་བསམ་གླིང་དགོན་པའི་བླ་མ་དགེ་བཤེས་གཙུག་ཕུད་རྣམ་རྒྱལ་ལགས། བརྟན་བཞུགས་གོ་སྒྲིག་ཚོགས་པའི་ཚོགས་གཙོ་ཀུན་གསལ་ཟླ་བ་ལགས་དང་། བརྟན་བཞུགས་གོ་སྒྲིག་ཚོགས་པའི་འགན་འཛིན་ཚོགས་མི་བྱ་འཕུར་དགེ་བཤེས་ལྷུན་གྲུབ་རྒྱ་མཚོ་ལགས། ༧དཔལ་ཁྲི་བརྟན་ནོར་བུ་རྩེའི་མཁན་ཟུར་དགེ་བཤེས་ཉི་མ་དབང་རྒྱལ་རིན་པོ་ཆེ། དབྱིན་ཇིར་གནས་བཞུགས་ཁྱིམ་གསར་བླ་མ་ཕུན་ཚོགས་བཀྲ་ཤིས་རིན་པོ་ཆེ་དང་། སྐུ་ངོ་བྱ་དུར་བསོད་ནམས་བཟང་པོ་ལགས། སྤྱི་འཐུས་དགེ་བཤེས་སྨོན་ལམ་མཐར་ཕྱིན་དང་བ་ར་ཚེ་དབང་བཀྲ་ཤིས། དབྲ་ཙ་བསོད་ནམས་ནོར་བུ། འཕྲིན་ལས་འོད་ཟེར། གངས་རི། བོན་གཞིས་ས་གནས་འགོ་འཛིན་བློ་ལྡན་ཉི་མ་ལགས་དང་། ཝཱ་ཎཱ་དབུས་བོད་ཀྱི་གཙུག་ལག་སློབ་ཆེན་གྱི་གཡུང་དྲུང་བོན་དགེ་སློབ་ཁང་གི་དགེ་སློབ་རྣམ་པ། ས་གནས་ཉིན་སློབ་ཁང་གི་དགེ་སློབ་རྣམ་པ། བོན་གཞིས་བཙུན་དགོན་གྱི་དགེ་སློབ་རྣམ་པ། དེ་བཞིན་བོད་ཕྱི་ནང་གཉིས་དང་ཤར་ནུབ་རྒྱལ་ཁབ་ཡུལ་གྲུ་ཁག་ནས་ཕེབས་པའི་བོན་འབངས་དད་ལྡན་སེར་སྐྱ་སྟོང་ཕྲག་ལས་བརྒལ་བར་འཛོམས་ཡོད། བརྟན་བཞུགས་དངོས་གཞིའི་ཉིན་གཉིས་པ།
བོད་ཟླ་བ་དགུ་པའི་ཚེས་གཉིས་ཕྱི་ལོ་༢༠༡༦ཟླ་བ་༡༡ཚེས་༡ཉིན་ཏེ་སྐུའི་བླ་གཟའ་མིག་དམར་ཉིན་འཛམ་གླིང་བོན་གྱི་གཙུག་རྒྱན་༧སྐྱབས་རྗེ་༧རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་ལ་བརྟན་བཞུགས་རྒྱས་འབུལ་གྱི་ཉིན་གཉིས་པའི་སྐབས།
ཕྱི་ཟླ་བ་༡༡ཚེས་༡བླ་གཟའ་མིག་དམར་ཉིན་གྱི་ཞོགས་པར་དད་ལྡན་བླ་སྤྲུལ་རྣམས་དབུ་བཞུགས་ཐོག་འཛམ་གླིང་ཤར་ནུབ་ཁག་ནས་ཕེབས་པའི་སྐྱ་སེར་སྟོང་ཕྲག་ལས་བརྒལ་བས་སྨན་རིའི་ལྷ་རྒྱལ་རི་ལ་བསང་གསོལ་གཏོང་བཞིན་པ།
བརྟན་བཞུགས་དངོས་གཞིའི་མཛད་རིམ་ཉིན་མོར་སེར་སྐྱ་སྟོང་ཕྲག་གིས་སྨན་རིའི་ལྷ་རྒྱལ་རི་ལ་བསང་གསོལ་གཏོང་བཞིན་པ།
རིན་པོ་ཆེ་མཆོག་སྨན་རིའི་བླ་བྲང་ཉི་འོད་འཁྱིལ་བ་ནས་སྨན་རིའི་ཚོགས་ཁང་དུ་སེར་འཕྲེང་བསྒྲིག་ནས་ཕེབས་བསུ་ཞུ་བཞིན་པ།
བརྟན་བཞུགས་སློབ་སྟོན་ཚོགས་མི་བྱ་འཕུར་དགེ་བཤེས་ལྷུན་གྲུབ་རྒྱ་མཚོ་ལགས་དང་བརྟན་བཞུགས་རྒྱས་འབུལ་གོ་སྒྲིག་ཚོགས་པའི་ཚོགས་གཙོ་ཀུན་གསལ་ཟླ་བ་ལགས་རྣམ་གཉིས་ནས་མཎྚལ་འདེགས་འབུལ་ཞུ་བཞིན་པ།
སྨན་རིའི་གྲྭ་ཚང་དང་ཁྲི་བརྟན་ནོར་རྩེའི་གྲྭ་ཚང་དེ་བཞིན་རྫ་སྨོན་རྒྱལ་དགོན་དང་ཞུ་རི་ཞང་དགོན་བཅས་ཀྱི་དགེ་འདུན་མང་ཚོགས་རྣམས། ཕྱི་ཚེས་གཅིག་ཉིན་གྱི་ཞོགས་པར་སྨན་རིའི་ཚོགས་ཁང་མདུན་ཐང་དུ་བརྟན་བཞུགས་འབུལ་མཁན་རྣམས་ཀྱི་བསྟར་འཕྲེང་བསྒྲིག་ཡོད་པ། ཕྱི་ཚེས་གཅིག་ཉིན་གྱི་ཞོགས་པར་སྨན་རིའི་ཚོགས་ཁང་མདུན་ཐང་དུ་བརྟན་བཞུགས་འབུལ་མཁན་རྣམས་ཀྱི་བསྟར་འཕྲེང་བསྒྲིག་ཡོད་པ། ཉིན་གཉིས་པའི་མཎྚལ་བརྟན་བཞུགས་ཡོངས་སུ་གྲུབ་ནས་༧སྐྱབས་རྗེ་༧རྒྱལ་བ་སྨན་རི་བ་མཆོག་བླ་བྲང་གཟིམ་ཆུང་ལ་གདན་འདྲེན་ཞུ་བཞིན་པ།
ཕྱི་དྲོར་བརྟན་བཞུགས་གོ་སྒྲིག་ཚོགས་མི་ལྷན་རྒྱས་༧དཔལ་ལྡན་སྨན་རིའི་བླ་བྲང་དུ་༧སྐྱབས་རྗེ་རྒྱལ་བ་སྨན་རི་བ་མཆོག་མཇལ་བཅར་དང་འབྲེལ་རིན་པོ་ཆེ་མཆོག་ནས་བཀའ་སློབ་གསུང་བཤད་དང་། ཐུགས་རྗེ་ལེགས་གསོལ་དུ་སྐུ་པར་མཐོང་གྲོལ་རིན་པོ་ཆེ་དང་དམ་རྫས་བྱིན་མདུད་བཅས་གསོལ་རས་བསྩལ་གནང་བ། བརྟན་བཞུགས་ཉིན་གསུམ་པའི་མཛད་རིམ་དང་བཀྲ་ཤིས་དགའ་སྟོན། བོད་ཟླ་བ་དགུ་པའི་ཚེས་གསུམ་ཕྱི་ལོ་༢༠༡༦ཟླ་བ་༡༡ཚེས་༢ཉིན་འཛམ་གླིང་བོན་གྱི་གཙུག་རྒྱན་༧སྐྱབས་རྗེ་༧རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་ལ་བརྟན་བཞུགས་རྒྱས་འབུལ་གྱི་ཉིན་གསུམ་པའི་སྐབས།
ཞོགས་པའི་ཕྱག་ཚོད་༩་པའི་སྟེང་༧སྐྱབས་རྗེ་རྒྱལ་བ་སྨན་རིའི་དཔོན་སློབ་རིན་པོ་མཆོག་ནས་དད་ལྡན་མང་ཚོགས་རྣམས་ལ་དྲན་པ་ཚེ་སྒྲུབ་ཀྱི་བཀའ་དབང་བསྩལ་གནང་མཛད་པ།
དད་ལྡན་དགེ་འདུན་མང་ཚོགས་ནས་དྲན་པ་ཚེ་སྒྲུབ་ཀྱི་བཀའ་དབང་ལ་གསན་བཞིན་པ། སྨན་རིའི་ཚོགས་ཆེན་འདུ་ཁང་ཆེན་མོ་ལ་དགེ་འདུན་མང་ཚོགས་རྣམས་དང་ཆེས་མཐོའི་སྐུ་ངོ་རྣམས་དང་བརྟན་བཞུགས་གོ་སྒྲིག་པ་རྣམས་ཀྱིས་བཀའ་དབང་ལ་གསན་བཞིན་པ།
བོད་གཞིས་བྱེས་གཉིས་དང་འཛམ་གླིང་ཤར་ནུབ་རྒྱལ་ཁབ་ཁག་ནས་ཆེད་ཕེབས་གནང་བའི་དད་ལྡན་མང་ཚོགས་རྣམས་ཀྱིས་བཀའ་དབང་ལ་གསན་བཞིན་པ།
ཕྱག་ཚོད་༢དང་སྐར་མ་༣༠ནས་༣པའི་བར་བརྟན་བཞུགས་གོ་སྒྲིག་ཚོགས་པའི་ཚོགས་གཙོ་མཆོག་ནས་བརྟན་བཞུགས་ཀྱི་སྔ་ཕྱིའི་བརྒྱུད་རིམ་དང་འབྲེལ་ངོ་སྤྲོད་གསུང་བཤད་གནང་བ། ཕྱག་ཚོད་༣པ་ནས་གཞས་སྣ་འཁྲབ་སྟོན་དབུ་འཛུགས་ཀྱིས་ཐོག་མར་བོན་གཞིས་ཉིན་སློབ་ཀྱི་སློབ་ཕྲུག་ཡོངས་ནས་རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་གི་བཀའ་དྲིན་རྗེས་དྲན་དང་། ཁོང་གི་སྐུ་ཚེ་ཡུན་དུ་བརྟན་པའི་སྨོན་འདུན་གྱི་མཉམ་གཞས་༼བཀའ་དྲིན་ཆེ། ཐུགས་རྗེ་ཆེ།༽ཞེས་པ་གཟིགས་འབུལ་ཞུས།
བྲོ་པ་རྒན་པ་རྣམས་ནས་མདོ་སྨད་བླ་བྲང་གི་འཁྲབ་གཞས་༼བོད་ཁ་བ་ཅན་གྱི་བླ་རི་༽ཞེས་པ་གཟིགས་འབུལ་ཞུས་པ། ཝཱར་ན་མཐོ་སློབ་ཀྱི་སློབ་མ་རྣམས་ཀྱིས་འཁྲབ་གཞས་༼རེབ་གོང་བསྐོར་བྲོ་ས་འདི་ལ་སྐྱེས་པའི་སྨོན་ལམ་འདེབས་༽ཞེས་པ་འཁྲབ་གནང་བ། གསོ་རིག་འབུམ་བཞིའི་མཐོ་སློབ་སྨན་རིའི་གླིང་གི་སློབ་ཕྲུག་ཁག་གཅིག་ནས་གཞས་དང་ཞབས་བྲོ་གཟིགས་འབུལ་ཞུས་པ། བོན་བུ་ཁྱིམ་ཁང་གི་སློབ་ཕྲུག་རྣམས་ཀྱིས་གཞས་དང་ཞབས་བྲོ་གཟིགས་འབུལ་ཞུས་པ།
བོན་བུ་ཁྱིམ་ཁང་གི་སློབ་ཕྲུག་རྣམས་ཀྱིས་གཞས་དང་ཞབས་བྲོ་གཟིགས་འབུལ་ཞུས་པ། ཕྱོགས་མཐའ་ཁག་ནས་ཆེད་ཕེབས་ཀྱི་སྐུ་མགྲོན་རྣམས་ཀྱིས་སྙན་ངག་གྱེར་འདོན་དང་གླུ་གཞས་བཏང་གནང་བ།
༧དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་དྲུང་ཆེ་དགེ་བཤེས་ཟླ་བ་དར་རྒྱས་ལགས་ནས་༧དཔལ་གཤེན་བསྟན་སྨན་རིའི་གླིང་གི་འདུས་སྤྱིའི་ཚབ་ཞུས་ཏེ་ཕྱོགས་མཐའ་ཁག་ནས་ཕེབས་པའི་སྐུ་མགྲོན་གཙོ་བོར་གྱུར་པའི་སེར་སྐྱ་ལྷན་རྒྱས་ལ་ཐུགས་རྗེ་ཆེ་ཞུའི་གཏམ་བཤད་དང་བཅས་བཀྲ་ཤིས་དགའ་སྟོན་གྱི་མཛད་སྒོ་མཇུག་ཡོངས་སུ་གྲུབ་པར་གནང་།
|
